Shillong, 21 Naitung:
Hynnin ka janmiet, ha ka por 6baje eiei, uwei u rangbah, uba kyrteng, U Bah Moris Biam, uba shong ba sah ha Bakur, ula jah rngai noh, katba u dang leit painkhana, ha rud nong jong katei ka shnong, kaba don ha Dawki.
Ynda haba la ioh jingtip, ia katei ka khubor, U Rupang, ula iakren bad U Assistant Rangbah Shnong, U bah Eraldus Lamin, ha kaba ula iathuh ba U bah Moris, um pat dei u dkhot jong ka Shnong, namar ba ka shnong trai jongu, ka dei na Umroi, hynrei, u iathuh ba na ka liang jong ka shnong, ka la iarap ban pynwad lem ia utei u briew, uba la shu jah rngai, naduh hynnin ka janmiet.
La iathuh ba U bah Moris, uba don 42snem ka rta, u leit painkhana sha shiliang jong ka surok bah Dawki, kaba dei sha ka lain, kaba mar khap artad bad ka Bangladesh.
Haba la kylli, la ka don kano kano ka jingsuba, halor ka jingjah jongu, U Bah Lamin, u iathuh ba ka shnong, ka la wad ia ka jingiarap jong ki pulit bad ki BSF ruh kumjuh ban wad ia utei u rangbah uba jah. La iathuh da, U bah Lamin, ba kim shym lah ruh ban iakren kham bha bad ka lok jongu ruh, ban ioh jingtip, ba u ong “Ka lok ruh iam shi iam”.