Shillong, 16 Risaw:
Ka jingrai jong u Myntri Rangbah ka jylla u Mukul Sangma ban iakhun na ki ar tylli ki jaka (konstitwensi) ka lah ban dei namar ba u sngewthuh ba u lah ban don ka jingma ha kane ka elekshon ban wan.
U Nongthoh khubor u la ioh ban iakren ban twad jingmut na ki katto katne ngut ki briew na Garo Hills kiba dei hi ki nongialam ka Congress, ki la iathuh ba ka jingthmu iakhun jong u Mukul ka lah ban don namar ba u sngewthuh ba u lah ban don hapdeng ka jingma ha kane ka kynti namar ba ka lyer ia ka Congress ka la tlot bha namar ba ka Ampati ka dei ka konstitwensi kaba shong khleh bha ki jaitbynriew bad bun ki dei ruh ki Hindu, ki ban kyrshan ia ka BJP ha kane ka kynti.
Ka BJP ka don u kyrtong jongka, uba dei ruh u MDC u Bhupen Hajong, uba lah ban pynkhynniuh bha ia ka kut ba skhem jong u Myntri Rangbah ha kane ka kynti, namar ka jingdon ka BJP ha ka bor ha ka sorkar pdeng bad ha Assam, la ong ki nongialam Congress bym kwah ban pynpaw kyrteng.
Kine ki nongialam Congress, ki la pynpaw ba kaba sngew phylla bha ha kane ka kynti, ka long ba wat ki Muslim kiba don ha ka thaiƱ ri thor ka Garo Hills, ki kren khohnioh ia ka Congress ha kane ka kynti, kaba ki ju kyrshan radbah bha bad kane ka dei kawei ka lyer kaba la pynlong lehse ia u Myntri Rangbah ban pyrkhat da kumwei ban shim ia ka rai ban leit iakhun na ar tylli ki jaka.
Lada ka NPP ka don ka jingiasngewthuh jingmut bad u kyrtong ka BJP, khlem pep, u Mukul u lah ban don hapdeng ka jingsyier bha ha kane ka kynti.
La iathuh ba ka jingphai khmat u Mukul Sangma sha Songsak kaba mihkhmat da u MLA ka NPP u Nihim D Shira, ka long namar ba ha katei ka konstitwensi, ym don jingkhleh jaitbynriew kumba long ha Ampati bad u lah ban kham pynsuk ia ki briew ban pyngeit da kaba suk.
Watla u Mukul Sangma u la kam ba ka Congress kan jop beit bun ngut na Garo Hills hynrei katkum ka jingpynpaw kine ki briew ka Congress, ki la ong ba ka lah ban hiar bha bad bun ki jaka ba lah ban jop da ki kyrtong shimet, namar ba ka NPP ruh kam lah than ban thaw pyrthei namar ba ka don ka jingiateh bad ka BJP.