![](https://www.urupang.com/wp-content/uploads/2024/07/image-73.png)
Shillong:Ka myntri ka tnad ka koit ka khiah ka kong Ampareen Lyngdoh ka la ong ba ka sorkar ka hap ban thung kam kontrak shwa ia ki kam nurse namar ba ka donkam kham kyrkieh ban ai ka jingshakri ha ki ha jaka sumar.
Haba kren mynta ka sngi, ka la ong ba ka la don ka jingduna nongtrei Nurse ha ki jaka sumar bapher bapher bad kiwei ki jait jingsumar ha ki jaka sumar kum ha hospital, ha CHC, PHC bad dei na kane ka daw, ba ka tnad ka koit ka khiah ka la khot jingpynbna ban thungkam kontrak shwa haduh ban ioh pat ia ka jingmang pisa ban khot biang ia ka jingthungkam pura.
Ka la ong ba ka tnad ka la ioh ia ka jingmang pisa kyrpang na ka tnad pla tyngka ka sorkar na bynta ban thung kam kontrak shwa namar ba kan shim por ban khot thungkam pura na ka jingbun ki jingdonkam.
Ka la ong ruh ba tang shu ioh ia ka jingmang pisa na ka sorkar, yn khot thungkam pura noh wut wut khlem pynslem.
Kane ka jingong ka myntri ka ong ba dang shen, ka kynhun ki Nurse ba trei kam kontrak kila ujor sha ka myntri ba ka dei ban pyndam noh bad ban khot thungkam da kaba pura, namar ba ka kam kontrak kam shym la buh ia ki ha ka jingshngain nalor ka jingrit ka jingsiew.
“Ka don ka jingduna jong ki nongsumar ha ki jaka sumar ha ki tnad jingsumar bapher bapher bad ka sorkar ka la plie ia ki tnad jait jingsumar bapher bapher dang shen, ha ki jaka sumar, bad ki don ki CHC ba kyntiew kyrdan bad kine ki donkam ia ki nongtrei bad ka sorkar ka la ioh ka jingmang pisa kyrpang na tnad pla tyngka. Bad dei na kane ka daw, ka sorkar ka khot kontrak namar ba kam pat ioh ia ka jingmang pisa ban thungkam pura, ban ym ktah ia ki jingsumar bad ka jingshakri ia ki paidbah” ka la ong.
Ka la ong, ‘Ka shim por ban mang pisa ia ki kam, bad na kane ka daw, ka sorkar ka hap ban thung kontrak shwa bad tang shu ioh ia ka jingmang pisa na ka sorkar, yn pynbna wut wut ban thungkam pura kumba 164 GNM bad 64 eiei ANM”.
Halor ka jingujor ki Nurse ban pyndam shwa ia ka jingkhot thungkam kontrak dang shen, ka kong Ampareen ka la ong, “Ki don kiba trei ha kiwei ki hospital bym dei jong ka sorkar bad nga la kylli balei phi don jingeh haba phi trei shawei ruh phi trei kontrak bad kila ong ba ki kam kontrak kim ioh ia ki shuti kha khunlung. Kum ia kane ka mat, nga la ong ba ngan shim khia ban pynbeit kum ia kane”.
Phi don ban ong eiei?