Nongpoh, 22 Naitung: Ki ophisar na ka tnat Labour, Police bad na ka tnat Infiltration ha Ri Bhoi, mynta ka sngi, ki la leit ban khynra ia ki kot ki sla ia kito ki nongtrei bar jylla, kiba trei ha ki Karkhana bapher bapher kiba don ha MIDC Umiam.
Ha katei ka sngi, ba kitei ki briew sorkar, ki la leit ban khynra kot ia kitei ki nongtrei bar jylla ha Umiam, ki la khot bad pyntip ruh sha ki nongialam shnong Umiam, khnang ban leit synranlang ia ki ha ka por ba ki leit khynra, namar ki nongialam shnong, ki kham tip bha halor ka jingdon ki bar jylla kiba trei ha ki Karkhana kiba don ha Umiam.
Haba iadei bad katei ka jingleit khynra nongtrei bar jylla ha Umiam, la lap ba bun na ki nongtrei ki la phetrieh noh, khamtam eh kito ki nongtrei bar jylla kiba ym biang ia ki kot ki sla kiba biang.
U Samla Steven Kharkrang, Rangbah Shnong Umiam, haba kren sha ki lad pathaikhubor, u la ong, ba ka long kaba donkam eh ban leit khynra ia ki kot ki sla ia ki nongtrei kiba trei ha ki karkhana kiba ha Umiam, namar ba ka la dei ka jaka kaba suk eh ha ka rung ka mih ki briew kiba ym ithuh ithaw bad haba ki la poi ha kitei ki Karkhana, kaba mut la eh ban leit wad ia ki, namar ha ka por ba ki briew ka ain ki leit ban khynra, bunsien bun na ki briew ki jah beit.
Na ka liang u rangbah shnong Umiam, u la kyntu ïa ki briew ka ain, ba ki dei ban shimkhia ha ka ban khynra naphang ia ki nongtrei bar jylla ha katei ka bad ki bym biang ia ki kot ki sla, namar na ka jingdon jong ki briew nabar kiba trei bylla ha katei ka jaka, ka buh jingma wat ia ki briew shnong, namar don ki khep ba ki briew shnong ki shah ktah kti ha ki nongtrei karkhana.
U la ong ruh ba kumba ka long mynta, ym lah shuh ban tip ia ki nongtrei ha ki Karkhana kiba don ha katei ka jaka bad mynta lei ka la kylla long kum ka ktem jong ki riewsniew, ha kaba ki la ijh ban bsuh khlieh ha katei ka jaka kum kum ki nongtrei bylla ha kitei ki Karkhana.
“Haba ngi la leit ban synran ia ki kitei ki ophisar sorkar kiba la leit khynra, ngi lap ba bun na ki nongtrei bar jylla ki la phet na ka jaka kaba ki trei, kumta na ka liang ka shnong ngi la rai ban bteng ha ka ban khynra beit ia kito ki nongtrei bar jylla bym biang ia ki kot ki sla kiba biang ” ong u Samla Steven Kharkrang.
Kumba ngi la ïoh jingtip ba ki don shibun ki briew kiba la rung beain sha kitei ki jaka ba don ki karkhana, ha kaba ki la rung lyngba khlem ki kot ki sla kiba biang bad kumba ka long mynta katei ka jaka ba don ki karkhana, ka la sdang ban rung sa u Drok, namarkata na ka liang ka shnong ngin sa shimkhia halor kane ka mat, u la bynrap.
ka Mut baroh shi kata kine ki labour,, police,, infiltration,,ki shu shong bam kai ia ka tulop ba draw na ka pisa paidbah mo….